Sisimiut
21.09.57
leol@greennet.gl

Piumassuseq • Suleqatigiinneq • Ineriartorneq 

Inuttut nunaqqatitullu nalunngilarput nammineq atukkatsinnut akisussaaqataasarluta, taamaattumik illoqarfitta toqqissisimanartutut, kajumernartutut aamma siuariartorfiusutut inissisimanissaanut taamatta akisussaaqataavugut. Kommunalbestyrelsemi angorusuppara tamatta susassaqarfitsinnut peqataatinneqartutut sunniuteqarsinnaasutullu atugarisatsinnut ineriartortitseqataanissamut periarfissinneqarnissarput.
Illoqarfipput aamma nunaqarfittagut Kalaallit Nunaanni qitiulluinnartumik inissisimapput, immami nunamilu uumasut aalisakkallu nerisassaqarniarnitsinnut avammullu niuernermi nunarsuarmilu piumaneqaqisut pigaagut, nunami aatsitassaqarpoq, nunarujussuaq allamiut takornariarusutaat pigaarput, inoqarpoq tamarmik immikkut pikkoriffilinnik, ilinniarfiit pigaagut, misilittagaqarluarpugut – nunaqqateqarpugut piumassusilinnik aamma ineriartorusuttunik – ineriartornermut toqqammavissat pigaagut.

Anguniagassat pingaartutut isigisat ilaat:

Inoqatinut ataqqinninneq

  • Illoqarfitsinni pingaartitavut eqqartortariaqarpagut.
  • Tamatta inuttut pisinnaatitaaffigut ataqqineqassapput.
  • Inatsisit peqqussutaat malillugit kommuni kiffartuussissaaq.
  • Meeqqanut angerlarsimaffimmi tujormisinneqartunut qimarnguimmik unnuiffigisinnaasaannik pilersitsisariaqarpugut.
  • Atuarfinni meeqqerivinnilu atugassatigut angajoqqaat siulersuisullu qulaatiinnartarnagit akisussaaqataatinnerusariaqarput.
  • Avataaniit ilinniariartut aamma nunaqqataalersut ersarissumik tikilluaqqusarlugit
  • Nappaammik eqqugaasimasut peqqisseqqinnissat toqqissisimaqqilernissaallu suleqataaffigiuassavarput, sioriartornissaannut ikiuunnerusariaqarpugut.
  • Utoqqaat innarluutillillu misigiuassavaat naapertuuttumik ikorfartorneqarlutik, isumagineqarlutillu.
  • Puigortunngortut immikkut angerlarsimaffeqalernissaat eqqartortariaqarparput
  • Kommunemi sulisut peqataatillugit inunnik kiffartuussineq pitsanngorsassavarput.

Inuussutissarsiorneq

  • Nunatsinni aalisartoqarnikkut tunisassiorfeqarnikkullu kommunerput siuttunngornissaminut periarfissaqarpoq.
  • Neqileriffik aqqutissiuutissallugu, nunatta imminut pilersorsinnaanissaa annertusarlugu, aammali sinerissamut avammullu niuerutissanik.
  • Nunami namminersorlutik inuussutissarsiutit ineriartornissaannut sinaakkutit pitsaasut, niuernermi suliaqartitsinermilu toqqammaviginerullugit.
  • Takornariaqarneq ineriartorfissaqaqaaq, nunaqavissut peqataatinnerullugit.
  • Innaallagissiorfeqarnikkut annertusaaqqinnissaq pisariaqalersimavoq.
  • Aatsitassarsiorfinnut, sakkutooqarfinnut, annertuumik sanaartorfinnut, kilisaatinut allanullu aningaasarsiorfiusinnaasunut nunaqqatigut pikkorissut nittarsaannerusariaqarpagut.
  • Sissami tunisassiorfinnut, imarsiortunut kiffartuussivinnut aamma queqarnikkut periarfissat nunagissaanikkut annertusartigit.

Inissaqarneq

  • Inissianik ullutsinnut akiminnullu naleqquttunik sanaartorneq annertusarlugu.
  • Kinguaagut nunaqqataalersussallu inissaqartariaqarput.
  • Inissiat peqqinnanngitsut qimanneqartariaqarput
  • Illut tamarmik nusuttakkanik anartarfeqalernissaat aqqutissiuutsigu

Ilinniartitaaneq

  • Atuarfiit meeqqanut pitsaanerusumik angusaqarfiulernissaannut tamatta ataqqeqatigiilluta suleqatigiittariaqarpugut, nukinnik atuinerusariaqarpugut.
  • Nunaqarfimmiut meeqqat atuartut, ilaqutaallu periarfissinneqarlik atuartut 8. klasse-miit Sisimiuni atualernissaannut.
  • Atuartut ilinniagassanut piumassuseqarneruleqqullugit kajumissaataasinnaasunik eqqartuisa.
  • Inuusuttut atuarfimmit anisut unittuussanngillat, minitaqarata malinnaaffigalugit ikiussavagut kaammattorlugillu.
  • Ilinniagaqarniartunut praktikkerfissanik peqartuarnissaq qulakkeertariaqarpoq.
  • Ilinniarnermik naammassinnittut suliffissaqarnissaat suleqataaffigalugu.

Angallanneq

  • Timmisartutigut angallanneq annertunerulertussaavoq, Sisimiuni aamma Maniitsumi timmisartoqarfigut ineriartornermut malinnaasariaqarput, billetsit akikitsut aamma periarfissat nutaat pisinnaajumallugit.
  • Bussit ilaat mittarfiup tungaanut ulluunerani ingerlaartalerlik.
  • Talittarfeqarnikkut isumannaassuseq aamma atuisunut kiffartuussisunullu atugassarititaasut pitsaanerusariaqalerput.
  • Aasaanerani sineriak atuarlugu kommunemi najugaqarfinnut ilaasortaatitigut kiffartuussineq akulikinnerulerlunilu ataqatigiisitsinerulerli.

Illoqarfiup isikkumigut ineriartornissaa

  • Illoqarfipput inuuffigissallugu suli alutornarnerulernissaa anguniarlugu pilersaarusiornissaq eqqartulertigu, aamma illoqarfiup qeqqata niuernikkut sammisassatigullu annertunerusumik pikialaarfinngornissaa eqqarsaatigalugu.
  • Pisuinnaat aqqutaat isumannaatsut amerlineqarlik, aamma ikaartarfinni.
  • Aqquserngit angallaffiunerusut naapertuuttumik sanarfisariaqarput, biilit amerleqaat.

Sunngiffik

  • Timersornermi aamma sunngiffimmi ingerlatat ineriartortinnerinut kommuni ersarinnerulluni peqataasariaqarpoq, aamma ingerlatsinermi inerisaanermilu tapiissuteqartarluni.
  • Inuusuttunut sammisassaat pillugit siunnersuisoqatigiit pilersinnissaat eqqartorneqartariaqartoq.
  • Timersornermi suleqatigiinnerunissaq siuariartornissarlu eqqarsaatigalugit siunnersuisoqatigiit pilersinnissaat eqqartorneqartariaqarpoq.
  • Kinaluunniit timersorusuttoq peqqinnerulerusuttorlu periarfissaqartariaqarpoq.
  • Timersuutinik misileerusuttut 5 turs klippekort-imik tunisalertigit, misileerusuttut ukiui apeqqutaatinnagit.
  • Kommunemi ataqatigiinnerulernissarput anguniarlugu ataatsimoorussamik tusagassiuuteqarnissaq suleqataaffigisigu.

Kommunip aningaasaqarnera

  • Kommunip karsiani innuttaasut aningaasaataat atorlugit suliffissat pilersinniarlugit siuarsaanermi sinaakutissanut aningaasaliisinnaasariaqarpugut.
  • Kommunip karsia naammaginartumik imaqartuassaaq.
  • Akileraarutip procentia qaffattariaqanngilaq, taamaakkaluartoq inuussutissarsiorlualernerup kommunip karsia immernerulersinnaavaa.

Kinaana Frederik Olsen?

Sisimiuni inunngorpunga 1957-mi, nuliaqarpunga pingasunillu inuusuttunik meeraqarlunga. Kalaallisut, danskisut aamma tuluttut oqaatsinik atuilluartarpunga, kisitsisit qanoq ataqatigiinnerinut aamma naatsorsuutinut paasinnillaqqissuullunga.
Inuusuttuullungali inuttut ineriartorneq aamma pikkorissartarnikkut ilinniagaqartuarneq kajumeralugit ingerlattuartarsimavakka. Pissarsiffigisannik atorfigisimavakka Sisimiut kommuniani oqaluttaaneruneq, suliffissarsiuussisarfimmi pisortaq, ICC 1989-mi Sisimiuni ataatsimeersuartitsimmat ataqatigiissaarisoq, Aalisarnermut Naalakkersuisoqarfimmi aalisarnermik nakkutilliinerup aqutseqataaffiginera, KNAPK-mi pisortaq aammalu ukiorpassuarni KNI A/S-mi nuannaarutigisannik nuna tamakkerlugu suleqataasimavunga, ukiunilu 5-ni KNI Pilersuisoq A/S-imi pisortallunga.

Maanna Sisimiut Timersortarfianni ittuuvunga, ullutsinnut siunissamullu tulluuttummik timersortarfiup amerlanernut iluaqutaasussanngorlugu ineriartortinnissaa pingaarnerit ilaattut suliaralugu. Taassuma saniatigut Issullummi aalisakkeriviliorniartunut aqutseqataavunga.
Ingerlatsinikkut, aqutsinikkut, suleqatigiinnikkut ineriartortitsinikkullu misilittagaqarluar-punga, taamaattumik Qeqqata kommuniata innuttaasa ineriartornikkut sallernut inisseqqinnissaat kommunalbestyrelsemi suleqataaffigerusuppara, ikiliartuinnarsinnaanngilagummi. Illoqarfipput najugaqarfigissallugu, suliffigissallugu aamma suliffeqarfinnik suliffinnillu pilersitsiffigissallugu kajumernartuaannartariaqarpoq.
Siunissamut isumalluarneq pigaara, tamatta isumallualertariaqarpugut.

Qinersilluarisi