Ukkusissat
31.05.68
martha-j.p@greennet.gl

Ikaarsaariarnermut ataatsimiititaliamut qinersineq 4 april 2017

Ilisaritinneq

Jakob Petersen-mik ateqarpunga Angussuarmik taaneqartarlunga 48-nik ukioqarpunga Ukkusissarmiuullungalu, Ikaarsaariarnermut ataatsimiititaliamut qiningassanngortippunga, siornatigut Uummannaq kommuneungallarmat Kommunalbestyrelsemut ilaasortaanikuuvunga aammalu  2002-miik 2005-mi qinersinissap tungaanut borgmesteriusimallunga. Aattaalli siullermeerlunga kommunerujussuarmut qiningassanngortillunga tassa ikaarsaariarnermut ataatsimiititaliaq januarip aallaqqaataani 2018  kommunalbestylsetut atuutilissaaq.

Qiningassanngortippunga kajumissaarneqarama qiningassanngorteqqullunga tamannalu akuerisimavara aammami isumaqarama suleqataasinnaallunga, isertuutissanngilaralu maanna killiffipput naammanginarnerpaatut nalilertannginnakku aammattaaq innuttaasut malinnaatitaanerput naammanginartutut isigisannginnakku ukiuni kingullerni sumiiffitsinni ineriartornikkut malinnaatinneqanngittutut misigisimangakku. Uummannammi aqutsiveqarfiani ineriartornikkut malinnaaniartariaqarpungut. Soorunami nalunngilara Kommunerilingassatsinni Uummannaq kisiat pineqanngittoq sullitassat tassaapput Ilulissat, Uummannaq, Upernavik, Qaanaaq, nunaqarfittaalu taakunanilu innuttaasut sullinneqarnerat ersarinnerulertariaqarpoq Soorunami pingaaruteqarpoq kommunerilingassatsinni pisinnaasat tunngavingalugit ingerlatsiniartoqartariaqarmat aamma aningaasaqarnikkut ingerlatsineq eqqarsaatigalugu.

Qiningassanngortinninnilu anguniagassatut sulissutigerusutattut makku taarusuppakka.

Innuttaasut sullinneqarnerat peqataatinneqarnerallu:

Ukiuni kingullerni innuttaasut  peqataatinneqarnerat annerusumik ingerlanneqarsimanngilaq tamanna allanngortinneqartariaqarpoq innuttaasut isumaasa tusarniarnerunissaat kommunellu ingerlanneqarnerani peqataatinneqarnerunissaat pisariaqarpoq qinikkammi tassaapput innuttaasut sinniisaat tamaattumik innuttaasut oqartussaaqataanerannik qulakkeerinnittussaapput taamaattumik inuttaasut peqataatinneqarnissaat qulakkeerniarlugu suleqataassuunga.

Inissaqarniarneq

Kommunerujussuanngornerup kingorna illuliortitsineq uninngavoq naak pisariaqartitsisoqarluartoq illoqarfinni nunaqarfinnilu, tamaattumik sulissutigisariaqarpoq nutaanik illuliortitsinerup ingerlaqqilernissaa. Inuup pisinnaatitaaffiinut ilaalluinnarpoq peqqinnartumik ineqarnissaq, taamaatumik kommunini innuttaasut nammineerlutik initaarnissaminnut  periarfissaqarnissaat naammassiniarlugu Siumumiik sulineq ingerlatissavarput.

Utoqqarnut inissaqartitsineq

Illoqarfinni utoqqaat illoqarput Uummannallu nunaqarfittaasa ilaani aamma utoqqaat ataatsimut najungaqatigiiffiannik ingerlatsisoqarpoq nunaqarfiilli ilai peqanngillat, qularnanngilarlu aamma kommunerilingassatsinni ilai aamma peqassanngittut, nunaqarfinniilluni utoqqaat kisimiittunngorsimasut angerlarsimaffinni ikiorteqarnikkut sullinneqartarput annerusumilli ikiortariaqarlersimasut nunaqarfitik qimallugit inissinneqartarput soorunami tamanna ajunngikkaluarpoq kisiannili nalunanngilaq utoqqaat kissaatigisaraluaraat ilaquttatik qimannagit nunaqarfigisamiinginnarnissaq, miserratissaanngilarlu utoqqaat nunaqarfinni annerusumik ikiortariaqaraluartut ikiorneqartanngittut tassani amingaataalluinnartarpoq najungaqatigiiffik taamaattumik sullissineq pitsaanerusoq anguneqassappat utoqqarnut najugaqarfiusut nunaqarfinni peqalersimanngittuni pilersinneqarnissaat qinikkatut sulilissanguma sulissutigissuara isumaqarama pisariaqarluinnartut.

Inuussutissarsiorneq

Kommunerilingassatsinni inuussutissarsiutit annersaattut taaneqarsinnaavoq aalisarneq, aalisarnikkut inuussutissarsiorneq aporfissaqartuarpoq tunitsivissaqarnikkut periarfissat ajornartorsiornartuartarput pissutinullu naleqqussaaneq ingerlanneqartariaqarpoq pissutsimmi taamaaginnarsinnaanngillat nalunngilara tamakkununnga kommune ingerlatsisuunngittoq taamaakkaluartorli kommune-mi qinikkat atukkat pitsaanerulersinniarlugit sunniuteqarniarnerusariaqarput tamanna ukiuni kingullerni maluginiangaassaasimanngilaq, aalisarnermi eqqarsaatigalugu tunitsiviit pitsaanerulerpata aningaasarsiornikkut kommunerilingassarput pitsaanerusumik  ingerlasinnaammat taamaattumik sunniuteqarniarnerunissaq suleqataaffigerusuppara.
Inuussutissarsiorneq aningaasarsiornikkullu siuarsaaneq eqqarsaatingalugu Uummannarlu eqqarsaatigalugu takornariaqarnikkut ingerlatsineq allatigullu siornatigut ingerlanneqartarsimasut maanna annaaneqarsimasut utertinniarlugit suliniuteqarnissaq pisariaqartorujussuuvoq maannami hotel-runneq eqqaanginnaaraanni annertuumik kinguariarnermik nassataqarsimasoq isumaqarpunga siuarsaaqqinnissamilu takornarissat amerlisarneqassappata, pikkorissarnerit ataatsimeersuarnerit piffinni allani ingerlanneqartartut maani aamma angummanniarfingalugit ingerlasariaqarpugut illoqarfimmi aamma ingerlaqqittariaqarmat, taamaattumik qanoq iliornikkut hotel-qarallarnertuut periarfissaqalersinnaaneq qanorlu aqqutissiuisoqarsinnaanersoq misissorluarneqarnissaa suliarisariaqarpoq.

Iluarsaassinerit aserfallattaaliinerit

Ilimagilluinnarpara Kommunerilingassatsinni aserfallattaaliinikkut  iluarsaassinikkullu annertuumik suliassaqartoq tassami ukiuni kingullerni annerusumik iliuuseqartoqartarsimanngilaq taamaattumik tamakkununnga annertuumik aningaasartuutisssaqartugut  ilimagilluinnarpara tamaattumik pingaaruteqartussaavoq nalilersuilluarnissaq Illoqarfinni nunaqarfinnilu aqqusineqarneq, nunaqarfinni illu sulliviit,  eqqaaveqarneq allatigullu pisariaqartuti-gut pitsanngorsaanerit ingerlaqqilertariaqarput.

Soorunami sorpassassuarnik saqqummiussuisoqarsinnaavoq  uangali saqqummiukkusutakka taakkua saqqummiuppakka nalunngilara qinikkatut sulissangaanni siammasissumik suliassaqartuartartoq qiningaassangumalu suleqataaffigiumaarpakka.

Naggasiut

Nuannaarutingaara qineqqusaarnermi peqataasinnaangama aamma nuannaarutingaara Siumut-miik sassaratta inuusuttunnguanik sassaqateqarluta taamaattumik sullissinissamut piareersimalluta sassarpungut. Kommunerilingassatsinni qiningaasussat suleqatigiittariaqarput taamaaliorutta kommunerilingassarput nukittuumik innuttaasunullu ajunngittumik sullissiviusoq  pilersinneqarsinnaasoq isuqarpunga.

Tamaattumik aprilip sisamaani qinersilluarisi.

Jakob Petersen Siumut
Qineruk